काठमाडौं, २५ माघ । बेरोजगार युवा-युवतीलाई विदेशमा आकर्षक तलबको प्रलोभनमा पारेर ठगी गरेको आरोपमा तीन जना पक्राउ परेका छन्।
पक्राउ पर्नेमा सुर्खेत गुर्भाकोट नगरपालिका-२ का ३६ वर्षीय रमेशकुमार डिसी, रोल्पा गंगादेव गाउँपालिका-५४१ वर्षीय जैबहादुर वली र मकवानपुर थाहा नगरपालिका-२ का ३८ वर्षीय रविन कार्की रहेका छन्।
उनीहरूलाई बिहीबार काठमाडौं उपत्यका अपराध अनुसन्धान कार्यालयको टोलीले काठमाडौंका विभिन्न स्थानबाट पक्राउ गरेको हो।
ब्युरो प्रवक्ता प्रहरी उपरीक्षक काजीकुमार आचार्यका अनुसार उनीहरूले रकम लिएर लामो समयसम्म झुक्यानमा राखी विदेश नपठाएर सम्पर्कविहीन भएपछि पीडितहरू उजुरी दिन आएका थिए।
डिसीले सिंगापुर पठाइदिन्छु भनी एक जना पीडितबाट १० लाख रुपैयाँ, वलीले क्रोएसिया पठाइदिने भनी एक जनाबाट ६ लाख रुपैयाँ ठगी गरेको आचार्यले बताए।
कार्कीले स्लोभाकिया पठाइदिने भन्दै एक जनाबाट १९ लाख रुपैयाँ ठगी गरेको प्रहरीले जनाएको छ। उनीविरूद्ध वृत्त बौद्धमा बैंकिङ कसुर सम्बन्धी ११ लाख ५० हजार बिगोको दुई वटा मुद्दा विचाराधीन रहेका छन्।
डिसी र वलीलाई आवश्यक कारबाहीको लागि वैदेशिक रोजगार विभाग पठाइएको छ भने कार्कीलाई वृत्त बौद्ध पठाइएको छ।
बौद्धको बैंकिङ कसुर मुद्दाको अनुसन्धान सकिएपछि कार्कीलाई प्रहरीले वैदेशिक रोजगार विभागमा उपस्थित गराउने भएको छ।
खबरसाइट डट कम (www.khabarsite.com) तपाईँको आफ्नै खबर साइट हो । हामी कुनै पनि आग्रह र पूर्वाग्रहरहित भएर हरेक पल सत्य तथ्य निष्पक्ष खबर पस्कने जमर्को गर्छौँ । हाम्रो यस स्वतन्त्र अभियानमा तपाईँको साथ अपरिहार्य छ ।
