काठमाडौँ । भोटेकोशी बाढीका कारण डुबानमा परी क्षतिग्रस्त बनेको धादिङको जहरे सबस्टेसन मर्मतपछि पुनः सञ्चालनमा आएको छ।
नेपाल विद्युत् प्राधिकरणका अनुसार भदौ १० गतेको बाढीले जहरेखेतस्थित सबस्टेसन डुबानमा परेको थियो। सबस्टेसन परिसरमा १० फिटसम्म लेदोसहितको पानी जमेपछि विद्युत् उपकरण तथा संरचनामा क्षति पुगेको थियो।
प्राधिकरणले आवश्यक जनशक्ति, उपकरण र सामग्री परिचालन गरी सबस्टेसनको मर्मत तथा पुन:स्थापनाको काम अघि बढाएको थियो।
ऊर्जा, जलस्रोत तथा सिँचाइ मन्त्रालयले पनि भोटेकोशी बाढीबाट प्रभावित क्षेत्रमा विद्युत् आपूर्ति पुन:सञ्चालन गर्न मर्मत तथा पुन:स्थापनाका काम भइरहेको जनाएको छ।
सबस्टेसन सञ्चालनमा आएसँगै गजुरी बजार, आदमघाट फिडरअन्तर्गतको २२ किलो क्षेत्र तथा पीडा फिडरअन्तर्गत किरान्चोक-मिलनटारलगायत क्षेत्रमा विद्युत् सेवा पुन:स्थापित भएको छ।
प्राधिकरणका अनुसार सबस्टेसनबाट आपूर्ति सुरु भएपछि प्रभावित क्षेत्रमा विद्युत् सेवा क्रमशः सामान्य बन्दै गएको छ।बाढीबाट क्षति पुगेका उपकरण र संरचनाको थप परीक्षण तथा मर्मत जारी राखिएको प्राधिकरणले जनाएको छ।
प्रभावित क्षेत्रमा नियमित र भरपर्दो विद्युत् सेवा सुनिश्चित गर्न बाँकी मर्मत तथा पुन:स्थापनाका कामलाई प्राथमिकतासाथ अघि बढाइएको छ।
