काठमाडौँ । नेपाल बार एसोसिएसनका अध्यक्ष गोपालकृष्ण घिमिरे विरुद्ध दर्ता भएको अदालतको अवहेलना सम्बन्धी मुद्दाको पेसी न्यायाधीशद्धय कुमार रेग्मी र कुमार चुडालको इजलासमा तोकिएको छ। सर्वोच्च अदालतमा उपरजिस्ट्रार गोविन्द घिमिरेको प्रतिवेदनका आधारमा बार अध्यक्ष घिमिरे विरुद्ध असोज १४ गते अदालतको अवहेलना निवेदन दर्ता भएको थियो । उक्त निवेदन फिर्ता लिने घोषणा घिमिरे स्वयम्ले गरेका छन् ।
बार अध्यक्ष घिमिरेले सर्वोच्च अदालतको रिक्त दुई न्यायाधीश नियुक्तिमा प्रधान न्यायाधीश एवं न्याय परिषद्का अध्यक्षले लेनदेन गरेको आरोप लगाएका थिए । तत्कालीन समयमा प्रधान न्यायाधीशको रूपमा विश्वम्भरप्रसाद श्रेष्ठ थिए भने उनी अवकाश भएका छन् ।
हाल प्रधान न्यायाधीशको रूपमा प्रकाशमानसिंह राउत रहेका छन् । न्याय परिषद् नियमावलीको विरोधमा बारले धर्ना दिइरहँदा परिषद्ले सर्वोच्चको रिक्त न्यायाधीशमा उच्च अदालतका दुई मुख्य न्यायाधीशहरू नृपध्वज निरौला र नित्यानन्द पाण्डेलाई सिफारिस गरेपछि घिमिरे रुष्ट भएका थिए ।
बारको विरोधलाई बेवास्ता गरेको भन्दै उनले यस्तो अभिव्यक्ति दिएका थिए । तर पछि बारले उक्त अभिव्यक्ति अदालतप्रति नभई न्याय परिषद् अध्यक्षको हकमा मात्र भएको भनी सच्चाएको थियो । सर्वोच्चमा आज हुने सुनुवाइले उक्त मुद्दा अघि बढ्ने कि नबढ्ने तय गर्नेछ। संयुक्त इजलासले खारेज गरेमा यो अघि बढ्ने छैन भने आदेश गरेर पुन सुनुवाइ अघि बढाएमा बार र बेन्चका बिचमा जारी द्वन्द्व बढ्ने छ।
खबरसाइट डट कम (www.khabarsite.com) तपाईँको आफ्नै खबर साइट हो । हामी कुनै पनि आग्रह र पूर्वाग्रहरहित भएर हरेक पल सत्य तथ्य निष्पक्ष खबर पस्कने जमर्को गर्छौँ । हाम्रो यस स्वतन्त्र अभियानमा तपाईँको साथ अपरिहार्य छ ।
