काठमाडौँ । शिक्षा तथा विज्ञान प्रविधि मन्त्री महावीर पुनले सिटिइभिटीलाई चार बुँदे निर्देशन दिएका छन् ।
विहिबार मन्त्री पुनले तुरुन्त कार्यान्वयनको लागि अध्यक्षको हैसियतले सिटिइभिटीलाई चार बुँदे निर्देशन दिएको जानकारी दिएका छन् ।
मन्त्री पुनले पहिलो निर्देशन मौजुदा पाठ्यक्रमलाई सुधार गरि नवप्रवर्तनलाई समावेश गर्न खाका तयार गरी असोज मसान्त भित्र पेश गर्न निर्देशन दिएका छन् । त्यस्तै दोस्रो निर्देशन एकीकृत क्यालेन्डर बनाउने र परीक्षाको परीक्षाफल तीन महिना भित्र अनिवार्य रुपमा प्रकाशन गर्ने व्यवस्था गर्ने निर्देशन दिएका छन् ।
त्यस्तै तेस्रो सिटिइभिटी कार्यालयमा विद्यार्थी, अविभावक र शिक्षकहरुको गुनासो सुन्ने र प्राप्त गुनासो को अभिलेखिकरण र सम्वोधन गर्ने शाखा तुरुन्त बनाउने र सञ्चालनमा ल्याउन निर्देशन दिएका छन् । मन्त्री पुनले चौथो निर्देशन २०६९ सालदेखि अहिलेसम्म सम्बन्धनको लागि प्राप्त भएका सम्पुर्ण आवेदनहरु छानविन गरि असोज मसान्त भित्र रिपोर्ट पेश गर्ने र सम्बन्धन दिने नदिने निर्णय तुरुन्त गर्न निर्देशन दिएका छन् ।
यसअघि मन्त्री पुनले मंगलबार तीन बुँदे निर्देशन दिएका थिए ।
जसमा नेपाल भरका सामुदायिक माध्यमिक विद्यालयमा पढ्ने विद्यार्थीहरु कम्प्युटर शिक्षा बाट बञ्चित नहुन् भन्ने उद्देश्यले पठनपाठनको लागि हरेक विद्यालयमा एक जना कम्प्युटर शिक्षकको दरबन्दी अनिवार्य थप्नु पर्ने, केहि बिश्वविद्यालयहरुले परीक्षा लिएर परीक्षाफल निकाल्न ८ महिनादेखि १ बर्ष सम्म लगाउने अवस्थाको अन्त्य गर्दै बढीमा ३ महिना भित्र अनिवार्य रूपमा परीक्षाफल निकाल्न निर्देशन दिएका थिए ।
त्यस्तै त्रिभुवन विश्वविद्यालय किर्तिपुरको हाता भित्र ठुलो क्षेत्रफलमा रहेको झाडी फाँडेर (ठुला रुखहरु नकाट्ने) सफा गरि सुन्दर बँगैचा सहित फुटपाथ बनाएर बिश्वविद्यालयलाई आकर्षक बनाउने निर्देशन दिएका थिए ।
