काठमाडौँ, ३० जेठ । विश्वकप फुटबल प्रतियोगिता अन्तर्गत समूह ‘बी’ को उद्घाटन खेलमा आयोजक क्यानडाले बोस्निया एन्ड हर्जगोभिनासँग बराबरी खेल्दै अङ्क बाँडेको छ । टोरन्टो स्टेडियममा भएको विश्वकपको तेस्रो प्रतिस्पर्धामा घरेलु मैदानको फाइदा उठाउने दाउमा रहेको क्यानडालाई बोस्नियाले १–१ गोलको बराबरीमा रोकेको हो । यस रोमाञ्चक खेलसँगै दुवै टोलीले प्रतियोगितामा समान एक–एक अङ्क जोड्दै विश्वकप यात्राको सुरुवात गरेका छन् ।
खेलको सुरुआती चरणमा आक्रामक देखिएको बोस्निया एन्ड हर्जगोभिनाले पहिलो हाफमा स्पष्ट अग्रता बनाएको थियो । खेलको २१औँ मिनेटमा जोभो लुकिचले उत्कृष्ट हेडरमार्फत गोल गर्दै बोस्नियालाई सुरुवाती सफलता दिलाएका थिए । लुकिचको सोही गोलको मद्दतले पहिलो हाफभरि बोस्निया १–० ले अगाडि रहन सफल भयो ।
तर, दोस्रो हाफमा घरेलु दर्शकको बलियो समर्थन पाएको क्यानडाले खेलमा पुनरागमन गर्यो । बोस्नियाले आफ्नो रक्षापङ्क्ति बलियो राख्ने प्रयास गरे पनि खेलको ७८औँ मिनेटमा क्यानडाका स्टार खेलाडी काइल लारिनले उत्कृष्ट गोल गर्दै खेललाई १–१ को बराबरी स्थितिमा ल्याए । लारिनको गोलपछि दुवै टोलीबाट थप गोल हुन सकेन र खेल बराबरीमै सकियो ।
यसैबीच, विश्वकप अन्तर्गत नै आज हुने चौथो खेलमा अर्को आयोजक राष्ट्र अमेरिकाले पाराग्वेको सामना गर्दैछ । समूह ‘डी’ मा रहेका यी दुई टोलीबीचको प्रतिक्षारत खेल नेपाली समय अनुसार साँझ ६:४५ बजेदेखि सुरु हुने तालिका रहेको छ ।
