धादिङ, २८ माघ २०८१ । प्रकृति संरक्षणको क्षेत्रमा योगदान पु¥याईरहेका बन संरक्षण अभियन्ता भूमिरमण नेपाल सहित चारजना अनुसन्धानकर्मी तथा संरक्षणकर्मीलाई ‘राष्ट्रिय प्रकृति संरक्षण पुरस्कार’बाट पुरस्कृत गरिएको छ ।
पुरस्कृत हुनेहरूमा त्रिभुवन विश्वविद्यालय, काठमाडौंका केन्द्रीय प्राणीशास्त्र विभागका सहायक प्राध्यापक डा. हरिप्रसाद शर्मा, पोखराका हेमन्त ढकाल, काठमाडौंका पत्रकार अभयराज जोशी र नीलकण्ठ नगरपालिका वडा नम्बर २ बसाहा धादिङका भूमिरमण नेपाल छन । उनीहरुलाई नगद २५ हजारसहित ताम्रपत्र र दोसल्लाले सम्मान गरिएको थियो ।
लाटोकोसेरो तथा हुचिलसँगै विभिन्न वन्यजन्तु तथा तराचुरुङ्गीको संरक्षण र सम्वद्र्धनमा जागरुकता जगाउन मिथिला वाइल्ड लाइफ ट्रष्ट र प्रकृतिका साथीहरूको आयोजनामा धनुषाको मिथिला बिहारी नगरपालिका–२ र ३ मा आयोजित १२औँ नेपाल लाटोकोसेरो तथा हुचिल संरक्षण उत्सव ०८१ को समापन समारोहमा सो पुरस्कार प्रदान गरिएको हो । उत्सव माघ २५ र २६ गते दुई दिन आयोजना गरिएको थियो ।सन् २०१२ देखि नेपालमा यो उत्सव मनाउन थालिएको हो ।
को हुन पुरस्कृत भएका वन संरक्षण अभियन्ता भूमिरमण नेपाल ?
भुमिरमण नेपाल, निलकण्ठ नगरपालिका वडा नं. २, बसाहा, धादिङका स्थायी बासिन्दा, वन संरक्षण र पुनर्स्थापनाका क्षेत्रमा परिचित अभियन्ता हुनुहुन्छ। बि.सं. २०३६/२०३७ सालदेखि नै स्थानीय समूहहरू गठन गरेर वन र वातावरण जोगाउन उहाँले अभियान सुरु गर्नुभएको हो। उहाँले करिब २०० सामुदायिक वनको स्थापना र हस्तान्तरणमा नेतृत्वदायी भूमिका निर्वाह गर्नुभएको छ।
वन र प्राकृतिक स्रोतको महत्वबारे जनचेतना फैलाउन उहाँले सयौं कार्यक्रम सञ्चालन गर्नुभएको छ। भित्ते पत्रिका प्रकाशन, भित्तामा संरक्षण नाराहरू लेख्ने, र विगुल फुक्दै वन संरक्षणको सन्देश फैलाउने उहाँका प्रयासहरू उदाहरणीय छन्। वन संरक्षणको स्वामित्व र जिम्मेवारी स्थानीय समुदायमा हुनुपर्छ भन्ने उहाँको दृढ मान्यता छ।
भुमिरमण नेपालको अभियानले उनलाई काठ तस्कर र भु-माफियाको निशाना बनायो। यसै कारण कतिपय अवस्थामा उहाँ भूमिगत हुनु पर्यो भने कहिलेकाहीं पागलझैं अभिनय गरेर पनि आफूलाई जोगाउनुभयो। सानै उमेरदेखि बालबालिकालाई वन र वातावरणको महत्वबारे शिक्षित गर्न उहाँले विद्यालयका कक्षामा पुगेर वन संरक्षणका कक्षाहरू सञ्चालन गर्नुभयो।
नेपालको पहिलो लाटोकोसेरो तथा हुचिल उत्सव धादिङमा आयोजना गर्न उहाँको उल्लेखनीय योगदान छ। यसका साथै, उहाँले हरित विद्यालय कार्यक्रमअन्तर्गत सल्यानटारमा चरा र रुखको महत्वबारे चेतना शिविर सञ्चालन गर्नुभयो। उहाँको अथक प्रयासले नेपालमा वन संरक्षणलाई नयाँ प्रेरणा दिएको छ र वन्यजन्तुको लागि उपयुक्त बासस्थान सिर्जना गरेको छ।
वन संरक्षण अभियानमा आफ्नो घरसमेत बेचेका भुमिरमण नेपालले भन्ने गरेको “हर्रो होस् बर्रौ होस्, नाङ्गो नरहोस्; भङ्गेरा होस् गिद्ध होस्, उडिरहोस्” निकै चर्चित छ।
२०१३ साल श्रावण ६ गते जन्मिनुभएका नेपालको संयुक्त परिवार छ। नयाँ पुस्तामा वन र वातावरण संरक्षणको रुचि घट्दै गएकोमा उहाँ चिन्तित हुनुहुन्छ। उहाँले आगामी दिनमा पनि वन संरक्षण र प्रवर्द्धनमा निरन्तर लागिरहने प्रतिबद्धता व्यक्त गर्नुभएको छ। दुई दर्जनभन्दा बढी सम्मान र प्रमाणपत्र प्राप्त भइसकेका उहाँको जीवन नेपालमा वन र वातावरण संरक्षणको प्रेरणा स्रोत बनेको छ।
खबरसाइट डट कम (www.khabarsite.com) तपाईँको आफ्नै खबर साइट हो । हामी कुनै पनि आग्रह र पूर्वाग्रहरहित भएर हरेक पल सत्य तथ्य निष्पक्ष खबर पस्कने जमर्को गर्छौँ । हाम्रो यस स्वतन्त्र अभियानमा तपाईँको साथ अपरिहार्य छ ।
