धादिङ — पृथ्वी राजमार्गअन्तर्गत धादिङको धुनिबेँसी नगरपालिका–६ चालिसेमा शनिबार दिउँसो सातवटा सवारी आपसमा ठोक्किँदा ठूलो दुर्घटना भएको छ। यस दुर्घटनामा चारवटा सवारीसाधनका ३५ जना घाइते भएका छन्। दुर्घटनाग्रस्त सबै घाइतेलाई स्थानीय अस्पताल तथा काठमाडौंका विभिन्न स्वास्थ्य संस्थामा उपचारका लागि लगिएको छ।
जिल्ला प्रहरी कार्यालय धादिङका प्रहरी नायब उपरीक्षक (डिएसपी) प्रकाश दाहालका अनुसार काठमाडौंबाट गजुरीतर्फ जाँदै गरेको बा प्र ००१ क ००११ नम्बरको स्कूल बस, एनएल ०१ एबी ४६५४ नम्बरको डिब्बा कन्टेनर, ना ४ ख ७१५ नम्बरको ट्रक, लु ९५ प ३०७ नम्बरको मोटरसाइकल, जिजे ०३ ए के ३२३१ नम्बरको बस, काठमाडौंतर्फ जाँदै गरेको ग १ ख ८५५१ नम्बरको बस र बा १ प ९१७ नम्बरको पर्यटक बस एकै ठाउँमा ठोक्किएका हुन्।
डिएसपी दाहालले बताएअनुसार दुर्घटना डिब्बा कन्टेनरको ब्रेक फेल भएपछि सुरु भएको थियो। सुरुमा स्कुल बसलाई ठक्कर परेको र त्यसपछि अन्य सवारीमा क्रमशः ठक्कर परेको थियो।
घाइतेमध्ये अधिकांश स्कूल बसका विद्यार्थी रहेका छन्। विवरणअनुसार चितवनको स्कूल बसमा सवार २५ जना, गोरखाबाट काठमाडौंतर्फ जाँदै गरेको बसमा ८ जना, मोटरसाइकलमा १ जना र डिब्बा गाडीमा १ जना घाइते भएका छन्। घाइतेहरूको अवस्था जटिल भए पनि अहिले अस्पतालमा उपचार भइरहेको छ।
स्थानीय र प्रहरीको सहयोगमा दुर्घटनाग्रस्त सवारीलाई सडकबाट हटाइएपछि राजमार्ग पुनः सुचारु भएको छ। डिएसपी दाहालले भने, “सवारी हटाउन र राजमार्ग खुलाउन थप समय लाग्न सक्ने भएकाले स्थानीयहरूले ध्यान पुर्याउनुपर्छ।”
प्रहरीले दुर्घटनाको कारण बारे थप अनुसन्धान गरिरहेको जनाएको छ।
खबरसाइट डट कम (www.khabarsite.com) तपाईँको आफ्नै खबर साइट हो । हामी कुनै पनि आग्रह र पूर्वाग्रहरहित भएर हरेक पल सत्य तथ्य निष्पक्ष खबर पस्कने जमर्को गर्छौँ । हाम्रो यस स्वतन्त्र अभियानमा तपाईँको साथ अपरिहार्य छ ।
