काठमाडौं । लामो रस्साकस्सीपछि नेपाल राष्ट्र बैंकको १८ औं गभर्नरका रूपमा प्रा. डा. विश्वनाथ पौडेल नियुक्त भएका छन् । मंगलबार साँझ बसेको मन्त्रिपरिषद् बैठकले गभर्नरमा पौडेललाई नियुक्त गरेपछि राष्ट्र बैंकले लामो समयपछि नेतृत्व पाएको छ । गभर्नर सिफारिस समितिले तीन जनाको नाम सिफारिस गरेको थियो । जसमा पहिलो नम्बरमा पौडेल रहेका थिए भने दोस्रोमा निलम ढुंगाना र दिनेश भट्टराई रहेका थिए ।
ललितपुरमा रहेको नेपालकै सबैभन्दा महंगो युलेन्स स्कुलका बोर्ड सदस्यसमेत रहेकी कांग्रेस सभापति पत्नी आरजु राणा देउवाका व्यापारिक साझेदार तथा कांग्रेस पार्टीका सदस्य पौडेलले गभर्नरमा बाजी मारेका हुन् । आरजुकै नजिक भएका कारण उनी योजना आयोका उपाध्यक्षसमेत भइसकेका व्यक्ति हुन् । उनलाई कांग्रेसले गभर्नरका लागि अघि सारेपछि सिफारिस समितिबाट राजीनामा दिएका थिए ।
को हुन् पौडेल ?
पौडेलले अमेरिकाको ‘बर्कले युनिभर्सिटी’बाट सन् २०१० मा विद्यावारिधि गरेका छन् । गत ०७९ को चुनावमा चितवन निर्वाचन क्षेत्र नम्बर १ बाट नेपाली कांग्रेसको उम्मेदवार बनेका पौडेल निर्वाचनमा भने पराजित भएका थिए ।
पौडेल युलेन्स स्कुलको ‘बोर्ड अफ ट्रस्टी’मा अगस्ट २०१९ देखि जुलाई २०२१ सम्म रहेका थिए । निर्वाचनमा हार बेहोरेपछि पौडेलले काठमाडौं विश्वविद्यालय स्कूल अफ म्यानेजमेन्टमा भिजिटिङ प्रोफसर भएर काम गरे ।
यसअघि ७३ मेगावाट क्षमताको मिडल तमोर जलविद्युत कम्पनीको निर्देशक समितिको सदस्यका रूपमा समेत काम गरेका पौडेलले सानिमा बैंकको निर्देशक समितिको सदस्यका रूपमा समेत काम गरिसकेका छन् ।
विगतमा पौडेलले अन्तर्राष्ट्रिय श्रम संगठन (आईएलओ) मा आर्थिक सल्लाहकार भएर समेत काम गरिसकेका छन् । पौडेल यसअघि एमसीसीअन्तर्गत मिलेनियम च्यालेन्ज नेपालको कार्यालयमा अर्थशास्त्री एवं विज्ञका रुपमा रहेका थिए । अर्थ मन्त्रालयमा वरिष्ठ आर्थिक सल्लाहकारको भूमिका निभाइसकेका पौडेल इसिमोडको गभर्नर बोर्डका पूर्वअध्यक्ष समेत हुन् ।
त्यसैगरी, कोलम्बो योजना परिषदको अध्यक्ष र एसिया तथा प्रशान्त क्षेत्रमा क्षेत्रीय आर्थिक सहयोग तथा एकीकरणको समेत अध्यक्षका रूपमा उनले काम गरेका छन् । साथै, नेपाली उद्योग परिसंघ ९सीएनआई० को प्रमुख आर्थिक सल्लाहकारको अनुभव पनि उनमा छ ।
सर्वोच्च अदालतमा डा।पौडेलविरुद्ध नेपाल राष्ट्रबैंकको ऐनविपरीत गभर्नर नियुक्त गर्न लागिएको भन्दै गएको जेठको सुरुमा रिट नै समेत परेको थियो । अधिवक्ताद्वय प्रतीभा उप्रेती र विशाल थापाले सर्वोच्चमा दायर गरेको रिट अदालतले जेठ २ गते दरपिठ गरिदियो ।
पौडेलसँगै गभर्नरमा कायममुकायम निलम ढुंगाना तिम्सिना र पूर्व सचिव दिनेश भट्टराईको नाम समेत सिफारिस भएको थियो । तर लामो रस्साकस्सीबीच पौडेलले गभर्नरमा बाजी मारेका छन् ।
गभर्नरको पद रिक्त हुनु एक महिनाअघि नै नयाँ गभर्नर नियुक्ति गरी सार्वजनिक सूचनामार्फत जानकारी गराउनुपर्ने कानूनी प्रावधान छ । तर गभर्नर पद रिक्त रहेको करिब डेढ महिनामा राष्ट्र बैंकले नयाँ गभर्नर पाएको हो ।
खबरसाइट डट कम (www.khabarsite.com) तपाईँको आफ्नै खबर साइट हो । हामी कुनै पनि आग्रह र पूर्वाग्रहरहित भएर हरेक पल सत्य तथ्य निष्पक्ष खबर पस्कने जमर्को गर्छौँ । हाम्रो यस स्वतन्त्र अभियानमा तपाईँको साथ अपरिहार्य छ ।
